Postdoktor

Kunnskap som formar samfunnet

UiB skal vere blant Europas fremste universitet, internasjonalt kjent for høg kvalitet i forsking og utdanning. Som samfunnsinstitusjon skal vi bidra til ei berekraftig og demokratisk utvikling og vere ein attraktiv og inkluderande studie- og arbeidsplass.

Video:

https://youtu.be/M5n6RnScNgA

Postdoktorstilling 

Ved Det medisinske fakultet, Institutt for global helse og samfunnsmedisin, er det ledig ei stilling som postdoktor (100 %) for ein periode på tre (3) år. Stillinga er knytt til prosjektet Digital Phenotyping in people with Parkinsons Disease (DIGI.PARK) og er finansiert av Helsedirektoratet.  

DIGI.PARK-prosjektet har som mål å utvikle metodar for digital fenotyping av Parkinsons sjukdom ved bruk av berbare einingar for å betre måle motorsymptom og effekt av behandling. Prosjektet kombinerer kliniske vurderingar med kontinuerlege sensorbaserte målingar utanfor klinikken, og nyttar avanserte analysar basert på signalbehandling for å utvikle nye, sensitive digitale utfallsmål og biomarkørar. Les meir om prosjektet her: https://www4.uib.no/forskning/forskningsprosjekter/activeageing-digipark

Prosjektet er ein del av eit innovativt, aktivt og tverrfagleg forskingsmiljø: Senter for alders- og sykehjemsmedisin (SEFAS). DIGI.PARK-prosjektet er ei av fleire pågåande studiar ved SEFAS der sensordata frå berbare einingar og radarinstallasjonar blir nytta til å overvake symptom, intervensjonseffektar og sjukdomsforløp hos eldre og personar med nevrologiske sjukdommar som demens og Parkinsons sjukdom. Professor Bettina S. Husebø er leiar for SEFAS. Senteret tilhøyrer fagområdet for eldremedisin, samfunnsfarmasi og tverrprofesjonell samarbeidslæring (FEST) og har omlag 25 tilsette. SEFAS har eit stort nettverk både nasjonalt og internasjonalt. Prosjektet er eit samarbeid med Neuro-SysMed, eit leiande senter for klinisk behandling av og forsking på nevrologiske sjukdommar. SEFAS er lokalisert i Alrek helseklynge, Årstadveien, Bergen.  

Les meir om SEFAS: https://www.uib.no/sefas

Om prosjektet/arbeidsoppgåver:

• Postdoktoren skal utføre kvantitativ dataanalyse av tidsseriedata frå berbare einingar, med særleg vekt på utvikling av digitale biomarkørar og utfallsmål basert på kunnskapsdrivne metodar for Parkinsons sjukdom, samt utføre statistiske analysar på kliniske data og utvikle nye digitale mål. 
• Postdoktoren vil inngå i eit tverrfagleg team for å utforme nye utfallsmål for motoriske symptom ved Parkinsons sjukdom, basert på kontinuerlege digitale målingar.
• Delta aktivt i design, gjennomføring og kvalitetssikring av datainnsamling i DIGI.PARK.
• Bidra til publisering av forskingsresultat i internasjonale tidsskrift og presentere forskingsresultat på vitskaplege konferansar, samt delta i nasjonale og internasjonale samarbeid knytt til prosjektet og SEFAS.
• Postdoktoren vil delta aktivt i rettleiingsprosessen av ph.d.-studentar som hovud- eller medrettleiar.

Kvalifikasjonar og eigenskapar:

• Søkjar må ha oppnådd norsk ph.d.-grad eller tilsvarande utdanning innanfor medisinsk orienterte fag (slik som biomedisinsk teknologi, nevrovitskap eller psykologi), eller ha levert doktoravhandlinga innan søknadsfristen. Det er ein føresetnad at doktorgraden er oppnådd før tilsetjing kan skje og seinast innan 5 månadar etter søknadsfrist.
• Søkjar må ha god kompetanse innan kunnskapsdriven metodeutvikling og forklarlege algoritmar, utvikling av digitale utfallsmål og biomarkørar for Parkinsons sjukdom, samt prosessering og analyse av tidsseriedata frå akselerasjonssensorar. 
• Det er krav om at søkjar har erfaring frå eller formell opplæring i systemorientert utvikling av metodar for kvantifisering av motorsymptom for Parkinsons sjukdom, analyse av fleirnivå- og heterogene datastrukturar, medisinske/biologiske applikasjonar, sensorteknologi og sensordata og Matlab.
• Tidlegare erfaring med arbeid/forsking med heimebuande eldre vaksne med Parkinsons sjukdom, tverrfagleg tolking av signalanalyse, statistikk og klinisk data og andre relevante forskingsprosjekt vil bli rekna som ein fordel.
• Søkjarar som oppfyller krava til stillinga vil bli rangert etter styrke innanfor sine respektive felt i høve til relevansen av deira kompetanse mot noverande behov, strategiske mål og prioriterte område for framtidig utvikling ved SEFAS.
• Personlege eigenskapar som vil bli vektlagt i vurderinga av søkjarane er blant anna evne til å arbeide sjølvstendig, strukturert, samarbeide med andre, motivasjon, ansvarskjensle, arbeidsevne og entusiasme for forsking.
• I rangeringa av kandidatar vil det bli lagt stor vekt på dei personlege eigenskapane som stillinga krev.
• Flytande skriftlege og munnlege norsk- og engelskkunnskapar er eit krav.

Om postdoktorstillinga:

Postdoktorstillinga er ei åremålsstilling og har som hovudmål å kvalifisere den som blir tilsett for arbeid i faglege toppstillingar. Ingen kan tilsetjast i meir enn ein åremålsperiode som postdoktor ved same institusjon. 

Den tilsette kan bli pålagt pliktarbeid i form av undervisning og liknande arbeid ved instituttet.

Vi tilbyr:

• Spanande og utviklande arbeidsoppgåver i eit sterkt fagmiljø
• Løn for tida kr 690 000 (kode 1352) i lønsregulativet i staten. For søkjar med profesjonsstudium i medisin og odontologi er løn for tida kr 700 000. For søkjarar med spesialistutdanning er løn for tida kr 725 000. For søkjarar som har spesialistutdanning, må det leggjast ved spesialistgodkjenning frå Helsedirektoratet.
• Medlemskap i Statens pensjonskasse 
• Gode velferdsordningar

Søknaden skal innehalde:

• ei kort utgreiing om søkjaren sine forskingsinteresser og motivasjon for å søkje stillinga 
• karakterutskrifter og vitnemål (søkjarar med utanlandsk utdanning må leggje ved både vitnemål på originalspråket og autoriserte omsetjingar) og dokumentasjon på innlevert avhandling
• relevante attestar
• publikasjonsliste
• vitskapelege arbeid. Det er særs viktig at kvart av dei vitskaplege arbeida som det skal takast omsyn til ved vurderinga i sin heilskap vert lasta opp som vedlegg til søknaden (pdf).
• to referansar (namn og kontaktinformasjon) 

Generell informasjon:

Utfyllande opplysningar om stillinga kan ein få ved å vende seg til professor Bettina S. Husebø, Bettina.Husebo@uib.no; tlf. 480 94 660.

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Vi oppmodar menn om å søkje. Dersom fleire søkjarar har tilnærma like kvalifikasjonar, gjeld reglane for moderat kjønnskvotering.

Universitetet i Bergen nyttar meirinnsyn ved tilsetjing i vitskaplege stillingar.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.Nærare om tilsettingsprosessen her.