Kulturskulelærar og -inspektør (10 -100% stilling)

Kulturskulane i Valdres samarbeider tett for å gje gode rammer for lærarane. Vi har no fleire ledige oppgåver i kulturskulane i Vang, Vestre Slidre og Nord-Aurdal.
 

Vang kulturskule (VAK) er ein skule med stort utviklingspotensial og gode økonomiske rammer. Skulen arbeider først og fremst med betalande elevar, men er òg medviten om kulturskulen sitt breiare samfunnsoppdrag. For den rette kandidaten vil denne jobben kunne gje mange moglegheiter. Kulturskulen er samlokalisert med den einaste grunnskulen i kommunen. Her ligg det eit stort potensial for å utvikle nye former og arenaer for samarbeid. Skulen ønskjer òg å vidareutvikle dette samarbeidet.

 

Aktuelle undervisningsoppgåver i VAK: slagverk (14 %), gitar (12 %), samspel/band (5–10 %) og andre oppgåver som kan vise seg interessante.

 

Vestre Slidre kulturskule (VSK) er ein kulturskule med høgt engasjement og stor oppslutnad i befolkninga. Over halvparten av elevane i grunnskulen har ein eller fleire plassar i kulturskulen. Det tette samarbeidet med den einaste grunnskulen i kommunen gjer at mykje av undervisninga kan leggjast til dagtid. Skulen har òg ansvar for Kultur-SFO éin gong i veka. Dei som har dette ansvaret, legg opp aktivitetane i mindre grupper, etter eigne kvalifikasjonar.

 

VSK har eit høgt aktivitetsnivå. Til dømes er vi involvert i om lag 70 små og store arrangement kvart år. Difor har vi ei inspektørstilling som det er særs viktig å få besett. Ta gjerne kontakt om du vil vite meir om kva oppgåver som ligg i inspektørstillinga.

 

Aktuelle arbeidsoppgåver i VSK: slagverk (opp til 30 %), gitar og/eller band (10 %), inspektør (20 %), Kultur-SFO (4 %) og andre oppgåver som kan vise seg interessante. Det kan òg bli aktuelt med musikkundervisning i ungdomsskulen.

 

Nord-Aurdal kulturskule er den største kulturskulen i Valdres, med nye og moderne lokale sentralt på Fagernes. Aktuelle arbeidsoppgåver: slagverk (2 %) og korps i skulen (11 %) og andre oppgåver som kan vise seg interessante.

 

Dette er eit breitt spekter av oppgåver, og samla utgjer det meir enn full stilling. Vi legg difor opp til å fordele dette på meir enn éin person, men ønskjer samstundes å setje saman oppgåvene slik at minst éin person får VSK som sin hovudarbeidsplass og viktigaste inntektskjelde. Frå lokala til VSK, er det 20-25 minutt reise til dei to andre kulturskulane.

 

Vi har frå før lærargrupper med stor fleksibilitet. Det er difor naturleg å sjå stillingane i samanheng med det øvrige personalet. Nøyaktig fordeling av oppgåver vil bli avgjord når ein ser kompetansen til den einskilde søkjaren i samanheng med dei ressursane vi har frå før. Det meste av oppgåvene er i fast stilling, noko er vikariat.

Vi ber om at du i søknaden seier kva oppgåver du er mest interessert i, og kva du eventuelt reknar som mindre aktuelt.

Arbeidsoppgåver

• Undervisning med tilhøyrande førebuing og oppfølging.
• Konsertar og framsyningar.
• Samarbeid på tvers av fag når det er tenleg.
  

Kvalifikasjonar

• Du må ha nødvendig kompetanse for arbeidsoppgåvene.
• Høgare pedagogisk og/eller kunstfagleg utdanning er ein fordel.
• God erfaring kan kompensere for manglande utdanning.
• Generell musikkfagleg kompetanse er også bra

Har du utdanning i kulturskuleaktuelle fag, andre kunstfag, pedagogikk eller arbeid med barn og unge? Då ber vi om at kopi av vitnemål blir lagt ved søknaden.

Personlege eigenskapar

• Du blir glad når ungar veks gjennom gode opplevingar og meistring.
• Du brenn for faget ditt, ev. faga dine.
• Du er ansvarsbevisst og samvitsfull.
• Du trivst med å jobbe i team og samarbeider godt, men kan òg jobbe sjølvstendig.
• Du ser utviklingsmoglegheiter for deg sjølv og omgjevnadane dine, og du tek initiativ for å gripe dei.
• Du har ei pedagogisk tilnærming i møte med grupper og enkeltpersonar, og du evnar å reflektere over eigen pedagogisk praksis.
• Om du trivst med å jobbe med skuleklasser er det òg ein fordel.

Personlege eigenskapar vil bli vektlagde.

Vi tilbyr

• Ein jobb der du betyr ein positiv forskjell for elevane
• Ei spanande og variert stilling i eit godt arbeidsmiljø
• Lønn etter gjeldande tariffavtale
• Gode pensjons- og forsikringsordningar 

Om du får ei stilling med undervisning mest i Vang eller Nord-Aurdal, kan det vere aktuelt å vurdere kva kommune som skal gjere den endelege tilsetjinga.

Kontaktinformasjon

Gudbrand Silvet Heiene, Avdelingsleiar kultur, +47 41335496

Arbeidsstad

Slidrevegen 15

2966 Slidre

Nøkkelinformasjon:

Arbeidsgivar: Vestre Slidre kommune

Referansenr.: 5145138941

Stillingsprosent: 100%

Fast

Søknadsfrist: 01.07.2026