Kunnskap som formar samfunnet
UiB skal vere blant Europas fremste universitet, internasjonalt kjent for høg kvalitet i forsking og utdanning. Som samfunnsinstitusjon skal vi bidra til ei berekraftig og demokratisk utvikling og vere ein attraktiv og inkluderande studie- og arbeidsplass.
Video:
https://youtu.be/M5n6RnScNgAPostdoktor i medisinsk fysikk
Ved Institutt for fysikk og teknologi er det ledig ei stilling som postdoktor i medisinsk fysikk. Stillinga er for ein åremålsperiode på 3 år og knytt til Toppforsk-prosjektet BioPrecise Protons finansiert av Norges Forskningsråd.
Om prosjektet/arbeidsoppgåver:
Kandidaten vil ha ei sentral rolle i det 8-årige forskingsprosjektet BioPrecise Protons (2026-2034). Målet med BioPrecise Protons er å auke presisjonen i doselevering og å bringe ny kunnskap om biologisk effektivitet i protonterapi slik at vi kan spare det friske vevet som ligg rundt kreftsvulsten. Prosjektet vil omfatte både prekliniske studiar med celler og mus, samt detektorutvikling for sanntidsmåling av stråledose.
Postdoktoren si hovudoppgåve vil vere å gjennomføre Monte Carlo-simuleringar av prekliniske studiar og detektoreksperiment ved protonsentra i Bergen og Oslo. Arbeidsoppgåvene vil òg omfatte utvikling av nye metodar for såkalla biologisk optimering for protonterapi. Dette omfattar å nytte parametre som lineær energioverføring (LET) og mikro- og nanodosimetriske størrelsar i doseplanlegginga. Postdoktoren vil nytte både forskingsbasert og kommersiell programvare for doseplanlegging og doseberekning i prosjektet. Postdoktoren vil òg delta i det eksperimentelle arbeidet.
Postdoktoren vil jobbe i gruppa for medisinsk fysikk ved UiB som har eit breitt spekter av aktivitetar innan protonterapi med spesiell ekspertise innan strålebiologi, Monte Carlo-simuleringar og avansert doseplanlegging for protonterapi. Arbeidet vil bli utført i tett samarbeid med andre deltakarar i BioPrecise Protons, inkludert Høgskulen på Vestlandet samt fagmiljø innan protonterapi ved Kreftklinikkane på Haukeland Universitetssjukehus og Oslo Universitetssjukehus. Internasjonale partnarar inkluderer German Cancer Research Center, Heidelberg og Helmholtz-Zentrum Dresden-Rossendorf / Institute of Radiooncology – OncoRay. Postdoktoren vil dermed jobbe i eit internasjonalt og interdisiplinært forskingsmiljø med etablert ekspertise innan protonterapi og kandidaten vil bli oppfordra til å søke mobilitetsstipend for å gjennomføre forskingsopphold hos internasjonale samarbeidspartnarar.
Kvalifikasjonar og eigenskapar:
- Søkjarar må ha oppnådd ein grad tilsvarande ein norsk doktorgrad (ph.d.)innanfor fysikk eller tilsvarande, eller ha levert doktoravhandlinga si til vurdering innan søknadsfristen er ute. Det er ein føresetnad at doktorgraden er oppnådd før tilsetjing kan skje.
- Praktisk erfaring frå eller kompetanse innan Monte Carlo-simuleringar er eit krav.
- Praktisk erfaring frå eller kompetanse innan protonterapi er eit krav.
- Praktisk erfaring frå eller kompetanse innan programmering er eit krav.
- Praktisk erfaring frå eller kompetanse innan doseplansystem og doseoptimeringsalgoritmar er ein fordel.
- Praktisk erfaring frå eller kompetanse innan preklinisk forsking eller detektorteknologi er ein fordel.
- Egne forskingsambisjonar og motivasjon for å utvikle protonterapi er ein fordel.
- Søkjarar må kunne arbeide sjølvstendig, strukturert og ha gode samarbeidsevner.
- Søkjarar må ha gode engelskkunnskapar, skriftleg og munnleg.
Personlege og mellommenneskelege eigenskapar vil bli lagt vekt på. Forskingserfaring, ambisjonar og potensial vil også telle ved vurdering av kandidatane.
Særeigne krav for stillinga
UiB er underlagd regelverket for eksportkontroll og regelverket gjeld ved behandling av søknadar til stillinga.
Om postdoktorstillinga:
Postdoktorstillinga er ei åremålsstilling og har som hovudmål å kvalifisere den som blir tilsett for arbeid i vitskaplege toppstillingar. Kandidatar som manglar undervisningserfaring og/eller annan kvalifiseringskompetanse, vil få høve til kvalifiserande arbeid, anten i åremålsperioden eller gjennom eventuell forlenging av åremålsperioden (maks fire år totalt). Stillinga vil kunne bli forlenga med inntil eitt år dersom kandidaten får innvilga forskingsopphald i utlandet frå eksterne kjelder (maks fire år totalt). Ingen kan tilsetjast i meir enn éin åremålsperiode som postdoktor ved same institusjon I samsvar med Forskingsrådet sine reglar, kan heller ingen tilsetjast fleire gonger i NFR-finansierte postdoktorstillingar.
Etter tiltreding skal postdoktoren i samarbeid med rettleiar og instituttleiar utarbeide ein plan for kvalifiseringsarbeidet, inkludert framdriftsplan.
Det er ein føresetnad at den som blir tilsett gjennomfører prosjektet i løpet av tilsetjingsperioden.
Vi tilbyr:
- eit godt og fagleg stimulerande arbeidsmiljø
- tilsetjing som postdoktor (kode 1352) i lønsregulativet til staten. Dette utgjer ei årsløn på kr. 685 900. Vidare opprykk skjer etter stillingsansiennitet. For særleg kvalifiserte søkjarar kan det verte aktuelt å vurdere høgare løn.
- medlemsskap i Statens pensjonskasse
- gode velferdsordningar
Søknaden skal innehalde:
- ei kort utgreiing om forskingsinteresser og motivasjonen for å søkje stillinga
- ei detaljert grunngjeving av kvalifikasjonane dine i høve til dei oppførte krava, og korleis du oppfyller kvart kriterium. I tillegg bør du adressere dei nemnde "fordelane", då desse vil bli vurderte ved rangeringa av kandidatane.
- namn og kontaktopplysningar til to referansar. Ein av desse bør vere hovudrettleiaren frå doktorgradsutdanninga.
- CV
- karakterutskrifter og vitnemål. Dersom du enno ikkje har fullført doktorgraden må du levere ei stadfesting på at avhandlinga er levert.
- relevante attestar
- liste over vitskaplege arbeid (publikasjonsliste med lenkjer)
Søknad og vedlegg med attesterte omsetjingar til engelsk eller eit skandinavisk språk må lastast opp i Jobbnorge.
Generell informasjon:
Utfyllande opplysningar om stillinga kan ein få ved å vende seg til Professor Kristian Smeland Ytre-Hauge, Institutt for fysikk og teknologi, UiB, kristian.ytre-hauge@uib.no, eller instituttleiar Kjetil Ullaland, e-post: kjetil.ullaland@uib.no.
For HR-relaterte spørsmål ta kontakt med Vivian Stegen Jacobsen, vivian.jacobsen@uib.no.
Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.
Vi oppmodar kvinner om å søkje. Dersom fleire søkjarar har tilnærma like kvalifikasjonar, gjeld reglane for moderat kjønnskvotering.
Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.
Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.
Nærare om tilsettingsprosessen her.