Informasjonssikkerheitsleiar/IKT-rådgjevar

Om stillinga

Vil du jobbe i politiet med eit viktig og prioritert fagområde innan sikkerheit?

Som informasjonssikkerheitsleiar i Stab for verksemdstyring vil du saman med sikkerheitsleiar ha ei sentral rolle i politidistriktet sin sikkerheitsorganisasjon. Du skal bidra til å styrke det interne sikkerheitsarbeidet og verne verksemda mot utilsikta og tilsikta uønska hendingar. Arbeidet krev ei systematisk tilnærming for at verdiane våre skal beskyttast på ein formålstenleg måte. I rolla får du utvikle og følgje opp styringssystemet for informasjonssikkerheit, og bidra til at sikkerheitsarbeidet er godt forankra i organisasjonen. Stillinga er sentral i arbeidet med å sikre at informasjon blir handtert i tråd med krav til konfidensialitet, integritet og tilgjengelegheit. 

Du vil samarbeide tett med fagmiljø innan sikkerheit, personvern og dokumentasjonsforvaltning, og bidra til å gi politimeisteren eit heilskapleg bilete av sårbarheiter i politidistriktet og tiltak. Funksjonen inneber også samarbeid med relevante fagmiljø i politidistriktet og nasjonalt. 

I funksjon som IKT-rådgjevar skal du foreslå kva tiltak som bør prioriterast og bidra til politidistriktet si forståing av kva for føringar og krav som gjeld på IKT-området, og dei praktiske konsekvensane av desse. Arbeidet inneber tett samarbeid med fagmiljøa i politidistriktet og relevante nasjonale IT-miljø. Du vil arbeide med rådgjeving innan IT, planleggje og gjennomføre prosjekt, samt vidareutvikle eksisterande løysningar i tråd med lokale behov. Stillinga vil ha ei sentral rolle i arbeidet med innføring og vidare bruk av Microsoft 365 i politidistriktet.

Vi ser fram til å høyre frå deg!

Dette ser vi etter hos ein ny medarbeidar

Vi ser etter deg som har god fagleg forståing for informasjonssikkerheit og evner å omsetje krav, regelverk og føringar til praktiske og gjennomførbare løysingar i organisasjonen. Du kan arbeide sjølvstendig, tar ansvar for eigne oppgåver og bidreg aktivt til å utvikle fagområdet. For å løyse oppgåvene i denne rolla er det også viktig at du trivast med å jobbe utadretta, og at du bygger tillit og relasjonar på tvers av fagmiljø og organisasjonsnivå.

Du trivast med ein variert arbeidskvardag, kor du vekslar mellom operative oppgåver og langsiktig, systematisk arbeid. Rolla krev at du kan sjå heilskap og samanhengar, og at du bidreg til at informasjonssikkerheit blir en integrert del av verksemda.

Personleg eignaheit vil bli tillagt stor vekt.

Vi er på jobb for eit trygt Noreg. Som ein del av politiet sitt viktige samfunnsoppdrag, skal vi førebyggje og nedkjempe kriminalitet, skape tryggleik og vareta rettstryggleiken. Vi trur at mangfald bidrar til betre oppgåveløysing, og søkjer derfor medarbeidarar med ulik bakgrunn, erfaring, perspektiv og kompetanse. Dersom du har behov for tilrettelegging i rekrutteringsprosessen eller arbeidskvardagen, vil vi gjere vårt beste for å gi deg det du treng.

Arbeidsoppgåver

• premissgjevande og kontrollerande arbeidsoppgåver innan fagområdet informasjonssikkerheit etter myndigheit frå sikkerheitsleiar
• bidra til å vidareutvikle styringssystemet for informasjonssikkerheit i samråd med sikkerheitsleiar
• leggje til rette for og kontrollere at informasjon blir behandla i tråd med gjeldande regelverk, medrekna å ivareta konfidensialitet, integritet og tilgjengelegheit
• bidra til kompetanseheving og kulturbygging innan informasjonssikkerheit i organisasjonen
• følgje opp avvik og hendingar innan informasjonssikkerheit
• oppgåver innan personellsikkerheit
• ivareta risikostyring, under dette, gjennomføre og tilretteleggje for risikovurderingar
• bidra i tverrfagleg arbeid innan internkontroll, sikkerheit og personvern for å sikre ei heilskapleg oversikt over sårbarheiter i politidistriktet og nødvendige tiltak
• vere avløysar for sikkerheitsleiar ved behov
• vere bindeledd mellom politidistriktet og sentrale IKT-miljø i Politiets IT-tjeneste (PIT) og Politidirektoratet
• formidle og forankre sentrale IKT-relaterte krav og føringar i distriktet, følgje opp at desse blir etterlevd, rapportere avvik og saman med PIT og Politidirektoratet identifisere formålstenlege tiltak
• følgje opp PIT sine tenesteleveransar til politidistriktet
• kan påleggjast andre oppgåver

Kvalifikasjonar

Dette må du ha for å vere kvalifisert:

• relevant høgare utdanning innan informasjonssikkerheit/-teknologi, samfunnssikkerheit og/eller sikkerheitsleiing på minimum bachelornivå. Lang og relevant erfaring/kompetanse kan kompensere for utdanningskravet i særskilte tilfelle.
• minimum tre års relevant erfaring
• god IKT-kompetanse og oppdatert kunnskap om trendar og løysingar innan sikkerheit
• gode skriftlege og munnlege kommunikasjonsevner
• plettfri vandel og vere skikka for teneste i politiet. Politiattest (uttømmande og utvida) må hentast inn ved eventuell tilsetting, jamfør politiloven § 18 og politiregisterloven § 41. Ved søknad på stillinga må ein rekne med at det blir henta inn opplysningar frå enkelte av politiet sine register og system til bruk i vandels- og skikkaheitsvurderinga
• må kunne bli sikkerheitsklart og autorisert til nivå Hemmeleg jf. sikkerhetsloven

For å bli vurdert som seniorrådgjevar må du ha relevant mastergrad eller tilsvarande og minimum fem års relevant erfaring. I denne vurderinga kan relevant erfaring kompensere for kravet til mastergrad. Eventuell utdanning frå utlandet må vere godkjent av Nasjonalt organ for kvalitet i utdanning (NOKUT) eller Direktoratet for høgare utdanning og kompetanse for å bli vurdert.

Det er også ønskjeleg med

• erfaring innan risiko- og sårbarheitsanalyse
• erfaring frå arbeid med sikkerheitsloven og personopplysningsloven med tilhøyrande forskrifter
• kompetanse i styringssystem for informasjonssikkerheit jamfør ISO 27001
• erfaring med relevant opplærings- og formidlingsarbeid
• erfaring frå politiet

Personlege eigenskapar

For å trivast og lykkast godt i stillinga, ser vi for oss at du

• er ein pådrivar og tar initiativ der behov oppstår 
• kan arbeide strukturert, sjølvstendig og er fagleg trygg 
• har evne til å skaffe deg relevant informasjon og formidle denne vidare på ein god måte
• har gode sosiale evner og trivast med utadretta arbeid
• er fleksibel med evne til å handtere periodevis høg arbeidsbelasting

Som medarbeidar i politiet har du høg etisk medvit, du blir kjenneteikna av å vere modig og heilskapsorientert, du viser respekt og er tett på. Du kan lese meir om dei etiske retningslinjene våre og medarbeidarplattformen her.

Dette kan vi tilby om du vel oss

• ein spennande arbeidsplass med eit viktig samfunnsoppdrag der du får vere med på å forme politiet for framtida
• fast stilling som seniorrådgivar (SKO 1364) med brutto årslønn frå kr. 700 000 til kr. 875 000, eller rådgjevar (SKO 1434) med brutto årslønn frå kr. 600 000 til kr. 735 000. For særskilt kvalifiserte kan noko høgare lønnsplassering bli vurdert.
• medlemskap i Statens pensjonskasse som gir deg mange gode. Les meir om tilsettingsgoda dine på spk.no/medlemskap-i-spk. Det blir trekt to prosent frå lønna til innskot i Statens pensjonskasse.
• fleksibel arbeidstid og moglegheit for trening i arbeidstida 
• tilknyting til bedriftshelsetjeneste og fordelar ved å tilhøyre ei IA-bedrift

Tilsetting skjer på vilkår fastsett i statsansatteloven og personalreglementet for politiet, derunder at prøvetida er seks månadar. 

Mangfald i politiet

Dersom du har funksjonsnedsetting, innvandrarbakgrunn eller hol i CV-en, er det høve til å krysse av for dette i søknaden. Er du kvalifisert for stillinga, vil du bli vurdert for positiv særbehandling. Det inneber at minst éin søkjar frå kvar av desse gruppene blir innkalla til intervju.

Les meir om positiv særbehandling når ein søkjer jobb i staten her. 

Opplysningane du gir, blir brukt til å utarbeide anonymisert statistikk som alle statlege verksemder rapporterer i sine årsrapportar.

Video:

Slik søkjer du

Du søkjer ved å fylle ut CV i Jobbnorge sitt CV-skjema og skrive eit kort søknadsbrev. I tillegg må du leggje ved relevante vitnemål og attestar. Relevante kandidatar vil bli kalla inn til intervju.

Opplysningar om deg kan bli offentleggjorde sjølv om du har bede om ikkje å bli ført opp på søkjarlista. Dersom oppmodinga ikkje blir teken til følgje, vil du bli varsla om dette.